خلوها يا اهل الشعر أخماس وأسداس
قصيدتي هذي خطيرة مثيره

لله وللتاريخ ولكل هالناس
ولهالحياة الزايلة والمريره

وأللي مهوب لذروة الفكر عساس
ينظم لأصحاب النفوس الكسيره

الله الأول قبل لفظ الانفاس
عز وجل من الظنون الصغيره

ما مثل مثله مثل ولا له أجناس
يخلق مخلوق ولا يستشيره

أذل له وانصاع له وأحني الراس
أللي جعلني ما اعبد رب غيره

عساه يكسوني من السندس ألباس
في يوم يعرى به الأمير والأميرة

شاعر وذنبي غير وسكوتي أجراس
ونفسي على مالله عطاها فقيره

من كثر ما أعطي حب واخلاص واحساس
أنا ما عاد أعرف وشلون أصيره

في عقلي الباطن عقيده ونوماس
وفي واقعي خوف وتردد وحيره

هل يا ترى ببني على حلمي أساس
أم يا ترى ببقى على هالوتيره؟

والافلاس ماهو أفلاس من حلم الافلاس
إذا ما تملك لنفسك بصيره!

ما خلق شي إلا بقدر ومقياس
ما شي يغلب شي أو يستعيره

أللي خلق خوف وخلق ضيقة وياس
خلق أمن وأفراح وحب وبريره

لذلك الله لا يوليني أنجاس
ويكسوني بفضله ومنه وخيره

الرب إذا تحتاج له صرت نبراس
والإنسان إذا احتاج له صرت أسيره

والناس ناتج ناس استلطفوا ناس
أبناء رغبة واستهامه وغيره

لولا التلاطف وأللي ما بين الأقواس
ما شفت هالعالم شفوحه غفيره

ندور ويدور بنا كل هوجاس
ومن أجل ذلك روسنا مستديره

الكل تايه في مصيره ومحتاس
وماهوب هو أللي يحدد مصيره

فيا ليت ما تنسى الذواليق غراس
وما ينسى مجرى المياه وخريره

أعلم أللي عاث من بعد ما جاس
ترى الجهل راس الأمور الشريره

الإنسان لو يملك من الجن حراس
أحقر ذبابه قادره تستثيره !

وين الملوك أللي على أقباب الافراس
راحو وخلو المغريات الكبيره

هالأرض ياللي يرجل الناس تنداس
بواقي ابن داؤد وابن المغيره

الله يلعن كل مشرك وخناس
والله يلعن هالحياة القصيره

صغير الادراك وصغير الباس
يشوف كل الناس مثله صغيره

يا قلب برد كل ما هب نسناس
ما دام هاليمنى نديه جديره

يفداك من رزقه قتات وتمراس
لولا رئتينه ما طلع زفيره

شفاه من طرد الملذات يباس
وهو على عد الرواة وغديره

حديثه فما قال حمزه فعباس
ما حدث لمسلم عن أبو هريره

العمر فرحه وحده وعشرة أتعاس
ومن لا يجيره خالقه من يجيره

ومن عاش شاف وكل غبه بغطاس
والصدق خيرة مذخرته الذخيره

كل ما اكتشفت من الأصاحيب بلاس
أقول يالله جعل فالأمر خيره

خيره تعرف إن به من أصحابك اخساس
خيره ولكن يا عساها الأخيره

أقسى جروح الناس تغلبه بنعاس
ما يذبح الإنسان إلا .. ضميره

بعض البشر مثل ابتسامات الاعراس
على كثر ماهي مثيره ضريره

وحيد ولا عندك من الناس جلا س
أخير من شر الكلام وسعيره

والكل ما يخلو من أخباث وادناس
في كل نفس هناك حاجه حقيره

فمن قبل لا سوي مشاكل مع الناس
عندي مع نفسي مشاكل كثيره